რა არის კემპბელის ტესტი?

რა არის კემპბელის ტესტი?

ძაღლის არჩევა ძალიან საპასუხისმგებლო ღონისძიებაა, რადგან ძაღლთან ერთად გაატარებთ მრავალ წელს, ის გახდება, გადაჭარბების გარეშე, ოჯახის წევრი და ბავშვებისა და მოზრდილების საყვარელი არსება.
სელექციონერებთან სტუმრობისას, პოტენციური პატრონები უბრალოდ გაურკვევლობაში არიან, რადგან პატარები ისეთი უჩვეულოდ ლამაზები არიან, იმდენად მოსიყვარულეები, რომ ძალიან სასიამოვნოა მათი ხელში აყვანა. და გინდებათ სახლში წაყვანა „ამ პატარა შავის“ და „ამ პატარა თეთრის“ და, თუნდაც, „ამ პატარა საყვარელი თეთრი ლაქით“, რომელმაც ახლახან ბურთი მოიტანა. ძალიან რთულია ერთისთვის უპირატესობის მინიჭება. მაგრამ არჩევანის ტანჯვა უფრო იზრდება, თუ ძაღლს ირჩევენ არა მხოლოდ შინაურ ცხოველად, არამედ მცველად, მონადირედ ან რინგის მებრძოლად. როგორ შევაფასოთ ლეკვის ტემპერამენტი? როგორ გავიგოთ, ის ლიდერად გაიზრდება თუ მშვიდ არსებად? მოგიწევთ მასთან ბრძოლა ლიდერობისთვის, ყოველ ჯერზე იმის დამტკიცება, რომ თქვენ ხართ მთავარი, თუ ძაღლი უდავოდ დაემორჩილება თუნდაც ბავშვს? ბილ კემპბელის ტესტი დაგეხმარებათ გაიგოთ ლეკვის ხასიათი და გააკეთოთ სწორი არჩევანი. ეს ტესტი მუშავდებოდა რვა წლის განმავლობაში, ათი ათასზე მეტ ძაღლზე.
ტესტის ჩატარების რამდენიმე წესი არსებობს. პირველი მათგანი – ის უნდა განახორციელოს ადამიანმა, რომელსაც ლეკვები არ იცნობენ. მეორეც, ტესტი ტარდება დიდ და მშვიდ ოთახში, სადაც არ არის ყურადღების მისაქცევი გარე ფაქტორები (მაგალითად, ხმაური ან ხმამაღალი მუსიკა). არავითარ შემთხვევაში არ უნდა შეაქოს ან გაკიცხოს ტესტის ჩამტარებელმა ლეკვი, ეცადოს ნეიტრალურად მოექცეს მას. და ყველაზე მნიშვნელოვანი წესი ის არის, რომ ტესტი უნდა ჩატარდეს თვენახევარიდან ორ თვემდე ასაკის ლეკვებზე.
კემპბელის ტესტი შედგება ხუთი ტესტისგან, რომელთაგან თითოეული ტარდება მხოლოდ ერთხელ (არ შეიძლება გამეორება). ყველა ტესტი მიმდინარეობს მკაცრად განსაზღვრული თანმიმდევრობით. ასევე რეკომენდებულია დაუყონებლივ მოამზადოთ ცხრილი, სადაც შეიტანთ შედეგებს და მონიშნავთ ლეკვებს, რომლებიც გადიან ტესტირებას, რათა სწრაფად და მარტივად შეავსოთ მათზე არსებული მონაცემები, ფერის მახასიათებლებში დაბნევის გარეშე.

პირველი გამოცდა: კონტაქტურობის შეფასება

აუცილებელია ლეკვის ოთახში შეყვანა, იატაკზე დასმა და კართან დაბრუნება. გაჩერდით კარებთან, მიუბრუნდით მას, დაჯექით და დაუძახეთ, მოიპატიჟეთ ხელის ქნევით. ყურადღება! თუ ლეკვი მაშინვე გამოვარდა თქვენკენ, მაშინ თქვენ თავიდანვე არასწორად მოიქეცით: მაგალითად, თქვენ გამოელაპარაკეთ მას ან სხვა გზით გამოიწვიეთ, რომ გამოგყოლოდათ. შეფასების სისტემა: თუ ლეკვი არ არის შესაფერისი – 1 ქულა; გიახლოვდებათ ნელა და გაუაზრებლად, კუდი ჩამოშვებული აქვს – 2 ქულა; სწრაფად გიახლოვდებათ, მაგრამ კუდი არ აქვს აწეული – 3 ქულა; სწრაფად გიახლოვდებათ, კუდი აწეული აქვს – 4 ქულა; სწრაფად მოდის, სიამოვნებით აქნევს კუდს და გიწვევთ სათამაშოდ – 5 ქულა.

მეორე გამოცდა: ხასიათის დამოუკიდებლობის შეფასება

აიყვანეთ ლეკვი ხელში, დასვით ოთახის შუაში და კარისკენ წადით. ტესტის ქულების სისტემა: თუ ლეკვი არ გამოგყვათ 1 ქულა ენიჭება; მოდის არც ისე დიდი სურვილით, კუდი ჩამოშვებული აქვს – 2 ქულა; მოდის მზადყოფნით, მაგრამ კუდი მაინც დაშვებული აქვს – 3 ქულა. 4 ქულა ენიჭება ლეკვს, რომელიც სურვილით მოდის, კუდი აწეული აქვს, მაგრამ ის არ ცდილობს თქვენთან თამაშს. თუ ლეკვი სურვილით მოდის, კუდი აწეული აქვს, ცდილობს თამაშს (მაგალითად, ყეფს და ტანისამოსს გიჭერთ), ენიჭება 5 ქულა.

მესამე გამოცდა: მორჩილებისკენ მიდრეკილების შეფასება

აიყვანეთ ლეკვი და დასვით გვერდულად. დაიჭირეთ ხელით, დაადეთ მკერდზე. თუ ლეკვი მშვიდად ემორჩილება თქვენს ქმედებებს, აქტიური წინააღმდეგობის გარეშე, როდესაც ის დაწოლილია, მშვიდად იქცევა და არ ცდილობს გაქცევას, მიეცით მას 1 ქულა. თუ იატაკზე დასმულმა ლეკვმა თავი ასწია, გამოგყვათ, ცხვირს ხელზე გახებთ, მაგრამ წინააღმდეგობას არ გიწევთ, არ ცდილობს თქვენს ალოკვა ან, მაგალითად, კბენას – 2 ქულა. თუ დაწოლის დროს ლეკვი წინააღმდეგობას არ გიწევთ, მაგრამ როცა უკვე იატაკზე წევს, მოუსვენრად იქცევა, ხელებს გილოკავთ, აღშფოთებულია, 3 ქულას ვუწერთ. 4 და 5 ქულა ენიჭება ლეკვებს, რომლებიც აქტიურად ეწინააღმდეგებიან თქვენს მცდელობებს, ხოლო ხუთი ქულა, როდესაც ამ ქმედებას თან ახლავს კბენაც.

მეოთხე გამოცდა: ადამიანისადმი ტოლერანტობის შეფასება

რამდენჯერმე მსუბუქად წამოარტყით ლეკვს, ხელისგული გადაუსვით თავზე და ზურგზე. თუ ლეკვი არანაირად არ რეაგირებს თქვენს ქმედებებზე, მონიშნეთ ცხრილის შესაბამის სტრიქონში – 1 ქულა. თუ ლეკვი თქვენკენ შემობრუნდება, სველ ცხვირს ხელისგულზე გახებთ, მაგრამ არ გკბენთ, – 2 ქულა. თუ ხელებს გილოკავთ, სათამაშოდ გკბენთ, ზურგს გიშვერთ, რომ ხელი გადაუსვათ და მოეფეროთ, 3 ქულას ვუწერთ. თუ ლეკვს არ სიამოვნებს მოფერება, ცდილობს ამოტრიალებას, წკმუტუნებს, მაგრამ არ გკბენთ – 4 ქულა. თუ წინააღმდეგობას მთელი ძალით გიწევთ და გკბენთ კიდეც, მაშინ ვუწერთ 5 ქულას.

მეხუთე გამოცდა: დომინირებისკენ მიდრეკილების შეფასება

აიყვანეთ ლეკვი ხელში, აწიეთ სახის სიმაღლეზე და სახით თქვენკენ მოაბრუნეთ ისე, რომ სახეზე შემოგხედოთ. გააჩერეთ დაახლოებით 30 წამის განმავლობაში და დააკვირდით. თუ ლეკვი წინააღმდეგობას არ გიწევთ, მაგრამ არ ცდილობს როგორმე დაამყაროს თქვენთან კონტაქტი, ჩვენ ვაფასებთ მის ქცევას 1 ქულით. თუ ლეკვი წინააღმდეგობას არ გიწევთ, მაგრამ ამავდროულად ცდილობს თქვენი სახის ან ხელების ალოკვას – 2 ქულა. ლეკვის ქცევა, რომლითაც ჯერ წინააღმდეგობას გიწევთ, შემდეგ დამშვიდდება და ცდილობს აგლოკოთ- 3 ქულაა. ოთხ ქულას ვუწერთ, თუ ის წინააღმდეგობას გიწევთ, უარს ამბობს შემოხედვაზე, მაგრამ არ იღრინება და არ ცდილობს კბენას. ხოლო 5 ქულას იღებს ლეკვი, რომელიც აქტიურად ეწინააღმდეგება, იღრინება და ცდილობს კიდეც კბენას.
ტესტის ჩატარებისას უნდა გაითვალისწინოთ, რომ თუ ლეკვი ერთ ტესტში მიიღებს მაქსიმალურ ქულას, ხოლო მეორეში ყველაზე დაბალ ქულას, მაშინ სავარაუდოა, რომ შეცდომა დაუშვით ან ძაღლი თავს კარგად არ გრძნობს ( მაგალითად, არ ეძინა საკმარისად ან ავად გახდა).
ამ შემთხვევაში, შედეგების ხელახლა შესამოწმებლად, აუცილებელია მთელი ტესტის გამეორება რამდენიმე დღის შემდეგ და სხვა ოთახში. თუ შეფასებები განმეორებითი გამოცდით დადასტურდა, მაშინ შესაძლებელია ლეკვს ფსიქიკური დეფექტები ჰქონდეს. ან ადამიანი, რომელიც ტესტირებას აკეთებს, ყოველ ჯერზე ერთსა და იმავე შეცდომებს უშვებდეს.

ტესტის ქულები

ყველაზე საინტერესო ტესტის შედეგების შეჯამებაა. ტესტირების შედეგების მიხედვით, რომ ძაღლების რამდენიმე ჯგუფი არსებობს.

„ფრიადოსანი“ და “კარგი მოსწავლე“

სკოლისგან განსხვავებით, სადაც ასეთი ქულები განიხილება დადებითად, კემპბელის ტესტში ეს მთლად ასე არაა. თუ ლეკვმა ბოლო ორ ტესტში 5 ქულა დააგროვა, ხოლო დანარჩენ ტესტებში არანაკლებ 4 ქულა, მაშინ პოტენციურმა პატრონებმა უნდა იცოდნენ, რომ ამ ძაღლის არჩევისას მათ ვარჯიშზე დიდი დროის დახარჯვა მოუწევთ. ასეთი ძაღლი მთელი ძალით ეცდება დომინირებას და სხვების დამორჩილებას. ასეთ შინაურ ცხოველებს სჭირდებათ პატრონის პატივისცემა, მტკიცე ხელი და ძლიერი ნერვები. ამასთან, გასათვალისწინებელია, განათლების მკაცრი მეთოდები, სავარაუდოა, რომ საპირისპირო შედეგამდე მიგიყვანთ. მაგრამ თუ, წარმატებით გაუმკლავდებიან განათლებას, პატრონები მიიღებენ ერთგულ მცველს და მეგობარს.
თუ ლეკვი „კარგი მოსაწავლე“ ანუ „ოთხოსანი“ გამოდგა, ანუ ცხრილის თითქმის ყველა სტრიქონში აქვს 4 და დანარჩენში 3 ქულა, მაშინ სავსებით შესაძლებელია, რომ მოუხერხებელი ლეკვისგან მიზანდასახული და თავდაჯერებული ცხოველი გაიზარდოს, რაც შესანიშნავია, მცველის ან საძიებო-სამაშველო სამსახურისთვის. მაგრამ, როგორც წარჩინებულ მოსწავლეს, ასეთ ლეკვს არც ბავშვები და არც მოზარდები არ უნდა ენდონ. სასურველია, რომ ძაღლის პატრონი იყოს ზრდასრული, მტკიცე ხელით, მზად იყოს სერიოზულად გაუმკლავდეს ცხოველს, დიდი დრო გაატაროს სავარჯიშო მოედანზე.

“სამოსნები”

თუ ლეკვმა, ტესტირების შედეგების მიხედვით, ძირითადად 3 ქულა მიიღო, განსაკუთრებით ბოლო ტესტებში, მაშინ ის გახდება შესანიშნავი მეგობარი და თანამგზავრი. ასეთი ძაღლი არ არის მშიშარა და მოითხოვს საკუთარი თავის პატივისცემას, მაგრამ შეიძლება კარგად შეეგუოს თქვენს ქმედებებს. ეს ძაღლი ასევე ადვილად მოერგება ნებისმიერ პირობებს, არის ძალიან კარგად აღზრდილი და შესაფერისია ბავშვებიანი ოჯახისთვის. მართალია, სირთულეები შეიძლება წარმოიშვას, თუ პატრონებს სურთ შინაური ცხოველისგან დადგეს მკაცრი მცველი.

“ოროსნები”

თუ ლეკვმა, ძირითადად, 2იანები და 1იანები აიღო ტესტირებაში, მაშინ თქვენ წინაშე ძალიან მორჩილი და მომთმენი ძაღლია. თუმცა, არის სირთულეებიც. მიუხედავად იმისა, რომ ლეკვის გაწვრთნა ადვილი იქნება, თქვენ მოგიწევთ გაცილებით მეტი მოთმინება და მზრუნველობა გამოიჩინოთ, ვიდრე „სამოსმენთან“ მიმართებით და აუცილებელია, დიდი დრო დაუთმოთ სოციალიზაციას. ოროსნებს არ უყვართ ადამიანთან კონტაქტი, ისინი სრულიად კმაყოფილდებიან საკუთარი თავით და თქვენ უნდა დაარწმუნოთ ისინი, რომ მათთვის უკეთესი იქნება თქვენთან ერთად ყოფნა, ვიდრე მარტო. და თუ ასეთმა ლეკვმა ტესტების ნაწილისთვის ოთხები დაიმსახურა, მაშინ შესაძლოა, მის პატრონებს შეხება ჰქონდეთ, ერთდროულად, მშიშარა და აგრესიული ქცევასთან. ლეკვის არჩევა, რა თქმა უნდა, დაკვირვებითაა საჭირო, მაგრამ თუ თქვენში ყველაფერი ამბობს, რომ ეს არის ის „საყვარელი გოგონა“, ცხვირზე თეთრი ლაქით, ეს არის თქვენი ძაღლი, თუ 100% დარწმუნებული ხართ, რომ გაუმკლავდებით ნებისმიერ სირთულეს და შეძლებთ ღირსეულად აღზარდოთ იგი, ტესტის შედეგების მიუხედავად, წაიყვანეთ ლეკვი და დიდხანს და ბედნიერად იცხოვრეთ ერთად!
Leave your comment
Comment
Name
Email
error: Content is protected !!